ഏകാന്തവാസത്തിന്റെ (ഖൽവത്തിന്റെ) പ്രയോജനങ്ങൾ

ഏകാന്തവാസത്തിൽ പത്ത് പ്രയോജനങ്ങളുണ്ട്:

ഒന്നാമത്തെ പ്രയോജനം: നാവിന്റെ ആപത്തുകളിൽ നിന്ന് രക്ഷ നേടാം. കാരണം, ഒരാൾ ഒറ്റയ്ക്കാണെങ്കിൽ സംസാരിക്കാൻ ആരെയും കൂടെ കിട്ടില്ലല്ലോ. തിരുമേനി (സ) ഇപ്രകാരം പറഞ്ഞിരിക്കുന്നു:

"സംസാരിക്കാതെ മൗനം പാലിക്കുകയും അതുവഴി സുരക്ഷിതനാവുകയും ചെയ്ത അടിമയുടെ മേൽ അല്ലാഹുവിന്റെ കാരുണ്യമുണ്ടാകട്ടെ. അല്ലെങ്കിൽ സംസാരിക്കുകയും അതുവഴി നേട്ടം കൊയ്യുകയും ചെയ്തവന്റെ മേലിലും."

സാധാരണയായി, കൂട്ടായ്മകളെക്കാൾ ഏകാന്തത ഇഷ്ടപ്പെടുന്നവന് മാത്രമേ നാവിന്റെ ആപത്തുകളിൽ നിന്ന് രക്ഷപ്പെടാൻ സാധിക്കൂ.

നമ്മുടെ ശൈഖുമാരുടെ ശൈഖായ സയ്യിദീ അലി (റളിയള്ളാഹു അൻഹു) പറയുകയുണ്ടായി: "ഒരു പാവപ്പെട്ടവൻ (ഫക്കീർ) കൂട്ടായ്മകളെക്കാൾ ഏകാന്തതയും, സംസാരത്തെക്കാൾ മൗനവും, അമിതഭക്ഷണത്തെക്കാൾ നോമ്പും ഇഷ്ടപ്പെടുന്നത് കണ്ടാൽ, നിങ്ങൾ മനസ്സിലാക്കുക: അവന്റെ മറ നീങ്ങി, തെളിമ വന്നിരിക്കുന്നു. എന്നാൽ, അവൻ ഏകാന്തതയെക്കാൾ കൂട്ടിച്ചേരലുകളും മൗനത്തെക്കാൾ സംസാരവും നോമ്പിനെക്കാൾ അമിതഭക്ഷണവും ഇഷ്ടപ്പെടുന്നത് കണ്ടാൽ, നിങ്ങൾ അറിയുക: അവന്റെ മറ പൊളിഞ്ഞുപോയി, ശൂന്യമായിരിക്കുന്നു."

അൽ-ഖൂത്തിൽ (ഖൂതുൽ ഖുലൂബ്) ഇപ്രകാരം പറയുന്നു: "അമിതമായ സംസാരത്തിന്റെ ഫലങ്ങൾ: ഭയഭക്തി കുറയുന്നു, ദൈവഭയം ഇല്ലാതാവുന്നു, വിചാരണ നീണ്ടുപോകുന്നു, കിതാബ് (കർമ്മരേഖ) പരസ്യമാകുന്നു, ആഖിറത്തിൽ പ്രതികാരം ആവശ്യപ്പെടുന്നവർ കൂടുന്നു, അക്രമിക്കപ്പെട്ടവർക്ക് അക്രമികളോടുള്ള ബന്ധം കൂടുന്നു, കിറാമൻ കാത്തിബീൻ എന്ന മാലാഖമാരിൽ നിന്നുള്ള സാക്ഷ്യങ്ങൾ വർദ്ധിക്കുന്നു, ഏറ്റവും ഉന്നതനായ രാജാവായ അല്ലാഹുവിൽ നിന്നുള്ള തിരിഞ്ഞുനോട്ടം നിലച്ചു പോകുന്നു.

കാരണം, സംസാരം നാവിന്റെ മഹാപാപങ്ങളുടെ താക്കോലാണ്. അതിലൂടെ കളവ്, പരദൂഷണം (ഗീബത്ത്), ഏഷണിയോതിക്കൊടുക്കൽ (നമീമത്ത്), കള്ളസാക്ഷ്യം, അപവാദം എന്നിവയെല്ലാം കടന്നുവരുന്നു."

പിന്നീട് അദ്ദേഹം പറഞ്ഞു: ഹദീസിൽ ഇപ്രകാരം വന്നിരിക്കുന്നു:

 "ആദം സന്തതിയുടെ മിക്ക പാപങ്ങളും അവന്റെ നാവിലാണ്; അനാവശ്യ കാര്യങ്ങളിൽ മുഴുകുന്നവരായിരിക്കും അന്ത്യനാളിൽ പാപഭാരം ഏറ്റവും കൂടുതലുള്ള മനുഷ്യർ."

തുടരും..

ഏകാന്തവാസത്തിൻ്റെ പ്രയോജനങ്ങൾ (2-3)