ഏകാന്തവാസത്തിൻ്റെ (ഖൽവത്തിൻ്റെ) പ്രയോജനങ്ങൾ (2-3)

രണ്ടാമത്തെ പ്രയോജനം: കാഴ്ചയുടെ സംരക്ഷണവും ആത്മീയമായ നേത്രരോഗങ്ങളിൽ നിന്നുള്ള രക്ഷയും

ഒറ്റപ്പെട്ടു ജീവിക്കുന്ന ഒരാൾക്ക് (ജനങ്ങളിൽ നിന്ന് അകന്നുനിൽക്കുന്ന ഒരാൾക്ക്) മറ്റുള്ളവരിലേക്കും, അവർ മുഴുകിയിരിക്കുന്ന ഈ ലോകത്തിലെ ക്ഷണികാലങ്കാരങ്ങളായ വസ്തുക്കളിലേക്കും നോക്കുന്നത് ഒഴിവാക്കാൻ സാധിക്കും.

അല്ലാഹു പറയുന്നു:

{ وَلَا تَمُدَّنَّ عَیۡنَیۡكَ إِلَىٰ مَا مَتَّعۡنَا بِهِۦۤ أَزۡوَ ٰ⁠جࣰا مِّنۡهُمۡ زَهۡرَةَ ٱلۡحَیَوٰةِ ٱلدُّنۡیَا لِنَفۡتِنَهُمۡ فِیهِۚ وَرِزۡقُ رَبِّكَ خَیۡرࣱ وَأَبۡقَىٰ }

അവരില്‍ (മനുഷ്യരില്‍) പല വിഭാഗങ്ങള്‍ക്ക് നാം ഐഹികജീവിതാലങ്കാരം അനുഭവിപ്പിച്ചതിലേക്ക് നിന്‍റെ ദൃഷ്ടികള്‍ നീ പായിക്കരുത്‌. അതിലൂടെ നാം അവരെ പരീക്ഷിക്കുകയാണ്. നിന്‍റെ രക്ഷിതാവ് നല്‍കുന്ന ഉപജീവനമാകുന്നു കൂടുതല്‍ ഉത്തമവും നിലനില്‍ക്കുന്നതും.

[സൂറത്ത് ത്വാഹാ: 131]

ഇതിലൂടെ, അത്തരം കാര്യങ്ങളിലേക്ക് ആകാംഷയോടെ നോക്കുന്നതിൽ നിന്നും, അവ നേടാൻ വേണ്ടി മത്സരിക്കുന്നതിൽ നിന്നും മനസ്സിനെ തടയുന്നു.

​📝 പണ്ഡിത വചനങ്ങൾ:

​മുഹമ്മദ് ബ്നു സീരീൻ (റ) പറയുന്നു: "അനാവശ്യമായ നോട്ടത്തെ നീ സൂക്ഷിക്കുക! കാരണം അത് അമിതമായ ലൈംഗികാസക്തികളിലേക്ക് നയിക്കും."

​ചില സാഹിത്യകാരന്മാർ പറഞ്ഞു: "ആരുടെ നോട്ടങ്ങൾ അധികരിക്കുന്നുവോ, അവന്റെ ദുഃഖങ്ങളും നീണ്ടുനിൽക്കും."

​അവർ പറയുകയുണ്ടായി: കണ്ണേറിനു കാരണം കണ്ണു തന്നെയാണ്. അതായത്, തന്റെ നോട്ടം അഴിച്ചുവിടുന്നവൻ സ്വന്തം നാശത്തെ വേട്ടയാടുന്നു. നേത്രങ്ങൾ കൊണ്ട് വസ്തുക്കളിലേക്ക് നോക്കുന്നത് ഹൃദയത്തെ ചിതറിച്ചു കളയാൻ കാരണമാകുന്നു.

മൂന്നാമത്തെ പ്രയോജനം:

 ഹൃദയത്തെ സംരക്ഷിക്കൽ, കാപട്യം, ലോകമാന്യം (റിയാഅ്), മുഖസ്തുതി തുടങ്ങിയ രോഗങ്ങളിൽ നിന്ന് അതിനെ കാത്തുരക്ഷിക്കൽ

ചില യുക്തിമാന്മാർ (ജ്ഞാനികൾ) പറയുകയുണ്ടായി: "ആരെങ്കിലും ആളുകളുമായി ഇടപഴകിയാൽ, അവൻ അവരുമായി ഒത്തുതീർപ്പിൽ (അവരുടെ ഇഷ്ടത്തിനനുസരിച്ച് പ്രവർത്തിക്കുന്നതിൽ) ഏർപ്പെടും. ആര് ഒത്തുതീർപ്പിൽ ഏർപ്പെട്ടുവോ, അവൻ അവരെ പ്രീതിപ്പെടുത്താൻ ശ്രമിക്കും. ആര് അവരെ പ്രീതിപ്പെടുത്താൻ ശ്രമിച്ചുവോ, അവൻ അവരുടെ തിന്മകളിൽ അകപ്പെടുകയും നശിക്കുകയും ചെയ്യും."

ഒരു സൂഫി പറഞ്ഞു:

ഞാൻ അല്ലാഹുവിലേക്ക് മാത്രം ശ്രദ്ധ തിരിച്ച ഒരു 'അബ്ദാലിനോട്' ചോദിച്ചു: "യാഥാർത്ഥ്യത്തിലേക്ക് (തഹ്‌ഖീഖ്) എത്താനുള്ള വഴി എന്താണ്?"

അദ്ദേഹം പറഞ്ഞു: "സൃഷ്ടികളെ നീ നോക്കരുത്. കാരണം അവരിലേക്കുള്ള നോട്ടം ഇരുളാണ്."

ഞാൻ പറഞ്ഞു: "എനിക്ക് അതില്ലാതെ കഴിയില്ലല്ലോ."

അദ്ദേഹം പറഞ്ഞു: "എങ്കിൽ അവരുടെ സംസാരം നീ കേൾക്കരുത്. കാരണം അവരുടെ സംസാരം മനസ്സിന് കടുപ്പം കൂട്ടും."

ഞാൻ പറഞ്ഞു: "എനിക്ക് അതില്ലാതെ കഴിയില്ലല്ലോ."

അദ്ദേഹം പറഞ്ഞു: "എങ്കിൽ അവരുമായി നീ ഇടപെടരുത്. കാരണം അവരുമായുള്ള ഇടപെഴകൽ നഷ്ടവും സങ്കടവും (ഹസ്രത്ത്) ഒറ്റപ്പെടലുമാണ് (വഹ്ശത്ത്)."

ഞാൻ പറഞ്ഞു: "ഞാൻ അവരുടെ ഇടയിലാണ് താമസിക്കുന്നത്, എനിക്ക് അവരുമായി ഇടപെഴകേണ്ടി വരുമല്ലോ."

അദ്ദേഹം പറഞ്ഞു: "എങ്കിൽ നീ അവരിൽ സമാധാനം കണ്ടെത്തരുത് (അവരുമായി അടുപ്പത്തിലാവരുത്). കാരണം അവരിൽ സമാധാനം കണ്ടെത്തുന്നത് നാശമാണ്."

ഞാൻ പറഞ്ഞു: "ഇതും ചിലപ്പോൾ സംഭവിച്ചേക്കാം."

അദ്ദേഹം പറഞ്ഞു: "ഹേ മനുഷ്യാ! നീ കളിക്കുന്നവരിലേക്ക് നോക്കുകയും, അസത്യം പറയുന്നവരുടെ വാക്കുകൾ കേൾക്കുകയും, വ്യർത്ഥമായി സമയം കളയുന്നവരുമായി ഇടപെഴകുകയും, നശിച്ചവരിൽ സമാധാനം കണ്ടെത്തുകയും ചെയ്യുന്നു! എന്നിട്ട് നീ അല്ലാഹുവല്ലാത്ത മറ്റെന്തിലോ ശ്രദ്ധ വെച്ച് അനുസരണത്തിന്റെ മാധുര്യം അനുഭവിക്കാൻ ആഗ്രഹിക്കുന്നുവോ? അസംഭവ്യം (ഹൈഹാത്ത്)! അത് ഒരിക്കലും സംഭവിക്കുകയില്ല."

ശേഷം അദ്ദേഹം എന്നിൽ നിന്ന് മറഞ്ഞുപോയി.

ഇമാം ഖുശൈരി (റ) പറയുന്നു: "കഠിനാധ്വാനത്തിന്റെ ആളുകൾ (അർബാബ് അൽ-മുജാഹദ) തങ്ങളുടെ ഹൃദയങ്ങളെ മോശമായ ചിന്തകളിൽ നിന്ന് സംരക്ഷിക്കാൻ ആഗ്രഹിക്കുമ്പോൾ, അവർ ദുനിയാവിലെ മനോഹരമായ കാഴ്ചകളിലേക്ക് നോക്കുകയില്ല."

അദ്ദേഹം പറഞ്ഞു: "പരിശീലന ഘട്ടങ്ങളിലെ (രിയാദ) അവരുടെ ആത്മീയ പോരാട്ടങ്ങളിൽ (മുജാഹദാത്തുകൾ) ഇത് അവർക്ക് ഒരു വലിയ അടിസ്ഥാന തത്വമാണ്."

ഏകാന്ത വാസത്തിൻ്റെ പ്രയോജനങ്ങൾ - 1

ഏകാന്ത വാസത്തിന്റെ പ്രയോജനങ്ങൾ (5-6)